ភ្នំពេញ៖ ជនសង្ស័យម្នាក់ជាជនជាតិបូលីវី បានចូលទឹកដីកម្ពុជាតាមច្រកអាកាសយានដ្ឋានអន្តរជាតិភ្នំពេញកាលពីថ្ងៃទី១០ ខែកញ្ញា ឆ្នាំ២០២៣ ហើយក៏ត្រូវបានសមត្ថកិច្ចកម្ពុជាឆែកឆែរក្នុងវ៉ាលី ដោយជនសង្ស័យបានយកគ្រឿងញៀនចំនួនជាង៤គីឡូក្រាមរៀបជាបន្ទះដេរភ្ជាប់ជាមួយនឹងសម្លៀកបំពាក់ រួចហើយសមត្ថកិច្ចក៏បានឃាត់ខ្លួនបន្តចាត់ការតាមនីតិវិធី។

តាមព័ត៌មានផ្សាយដោយអគ្គស្នងការដ្ឋាននគរបាលជាតិ ជនសង្ស័យបានធ្វើដំណើរមកពីទីក្រុងរីយ៉ូ ប្រទេសប្រេស៊ីល ឆ្លងកាត់ឌុយបៃ បន្តមកប្តូរជើងហោះហើរនៅម៉ាឡេស៊ី រួចធ្វើដំណើរមកអាកាសយានដ្ឋានអន្តរជាតិភ្នំពេញ តាមជើងហោះហើរ MH762 ពីម៉ាឡេស៊ី។

គ្រឿងញៀនប្រភេទកូកាអ៊ីន (Cocaine) ទម្ងន់ ៤៣៥៦ក្រាម (គិតទាំងសំបកប្លាស្ទីក និង សាច់កំណាត់) ត្រូវបានជនសង្ស័យរៀបជាបន្ទះចំនួន៤៣ ដេរភ្ជាប់ជាមួយសាច់សម្លៀកបំពាក់។ ជនសង្ស័យ

ឈ្មោះ KAREN CECIA LOPEZ VACA ភេទស្រី ជនជាតិបូលីវី ឆ្នាំកំណើត១៩៨៧។

បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី៕